Hebreërs 13: 1-6 As broers moet julle mekaar altyd liefhê. Moenie nalaat om gasvry te wees nie, want deur gasvry te wees, het sommige mense sonder dat hulle dit geweet het, engele as gaste gehuisves. Dink aan die gevangenes asof julle self ook gevangenes is, en aan dié wat mishandel word, asof julle self ook mishandel word. Die huwelik moet deur almal eerbaar gehou word. Wees in die huwelikslewe getrou aan mekaar, want ontugtiges en egbrekers sal onder die oordeel van God kom. Hou julle lewe vry van geldgierigheid; wees tevrede met wat julle het. God self het gesê: “Ek sal jou nooit verlaat nie, jou nooit in die steek laat nie.” Daarom kan ons met vertroue sê: “Die Here is my helper, ek ken geen vrees nie: wat kan ‘n mens aan my doen?” Ons bevind onsself steeds in grendeltyd en weet nie wanneer dit heeltemal opgehef gaan word nie. Dit voel steeds of ek in ‘n droom vasgevang is en iemand my nog met ‘n vrot vis gaan wakker klap! Die Hebreërs skryfer noem dat ons aan die gevangenes moet dink asof ons ook gevangenes is… en siedaar! Ons is darem in ons eie huis vasgevang maar steeds – hier sit meeste van ons nou – geen strand op ‘n lekker somersdag nie – geen ontbyt en koffie by ons gunsteling “breaki”-plek nie. Ons moet onsself vry van geldgierigheid hou en tevrede wees met wat ons het. Soms sit ons die pot helemal mis! Waar trek mens die lyn tussen geldgierigheid en genoeg geld om gemaklik te lewe? Met die grendeltyd sien ons reeds hoe ons salaris wegkwyn en werksverliese toeneem – een tree vorentoe en 3 treë terug, maar hierdie treë is nie ‘n sokkie langarm nie. Wanneer God sê: “Ek sal jou nooit verlaat nie, jou nooit in die steek laat nie” moet ons dit begin glo. Wanneer dinge deurmekaar getuimel word en jy voel soos ‘n skaap wat deur ‘n jakkals gejaag is en so paar keer oor klippe geval het; weer opgevlieg het; tussen ander skape ingeduik en jou voortande uitgeskop is, moet ons begin bid dat ons Herder ons sal optel en weer ons angstige hartklop rustig sal maak. Dit is natuurlik makliker gesê as gedaan. Soms voel dit asof jy alleen is in ‘n wêreld wat so selfsigtig is, maar is ons werklik so onselfsigtig soos ons onsself voordoen? Is daar nie oomblikke wat selfsig jou ook oorweldig en jy tog ander ook te na kom nie? Ons wys maklik vinger na ander maar vergeet dat daar 3 vingers terug wys. Dis in hierdie oomblikke wat ons met die Here moet praat. Wanneer ek lees: “Die Here is my helper, ek ken geen vrees nie: wat kan ‘n mens aan my doen?” raak ek skaam omdat ek gedurig twyfel. Ek raak baie keer bang en dan bid ek en vra ek vir die Here om ons te beskerm en Hy doen dit. My suster se woonstelmaat het eenkeer gesê: “FEAR: False Evidence Appearing Real” en ek probeer dit onthou in hierdie tyd waarin ons onself bevind waar daar baie onderdrukking is; fopnuus die dag open om ons bloeddruk verby die osoonlaag te stoot; are te vernou; angstigheid aan te vuur en uiteindelik ons hart tot stillstand te ruk en vir wat? Omdat ek dit toegelaat het om myself so te onstel! Jaag ons dalk nie te gou spoke op nie? Ons gedagtes hol verward in alle windrigtings en dan het dit waaroor ons so bekommerd is nog nie eers ‘n voet in ons rigting gesit nie. Ons raak bang en vergeet dat ons eintlik net geloof moet hê. God belowe jou nie dat jou lewe perfek en sonder moeilike besluite en paaie sal wees nie maar Hy belowe dat Hy saam met jou op die reis sal wees en jou sal bewaar. Ek wens ek kon glo soos my pa. Hy is volwaar ‘n hardnekkige Afrikaner, maar terselfdertyd ‘n dienaar van God. Hy maak my baie kwaad as hy in die nag opstaan en sonder ‘n wapen net so in sy slaapklere die land inloop om te gaan kyk vir wat die honde blaf, maar terselfdertyd bewonder ek hom omdat hy geen mens vrees nie. Hy glo die Here behoed en bewaar hom en sê dikwels: “jou tyd is jou tyd.” Wanneer angstigheid jou in ‘n doodskis wil druk, bid en vertrou en sien hoe rustigheid jou omvou.
Moedersdag
1 Johannes 3:18 Liewe kinders, ons liefde moenie net woorde en lippetaal wees nie, maar moet met die daad bewys word, en dan in opregtheid. Vandag vier ons ons moeders, hetsy jou biologiese, aangetroude, aangenome of iemand wat as ‘n moederfiguur in jou lewe optree. My pa sê altyd elke dag is moedersdag en ek moet met hom saamstem, maar vandag vat ons die tyd en doen die moeite om dit spesiaal vir daardie moeder te wys. Ek is bevoorreg om nog ‘n goeie verhouding met my ma te hê, en so ook met my skoonma. Daar is baie dae wat ek nie weet wat om te doen nie veral as dit by my kinders kom en dan tel ek my sel op en bel my mamma, want in my oë sal ek altyd haar dogter wees wat haar raad benodig en opsien na haar. Om die voorreg gegun te word om ‘n ma te wees is soms maklik, maar daar is baie oomblikke wat ek wonder of ek die regte ding doen. Hierop het my ma gesê dat ek altyd my instink moet volg en weet jy dit is so waar. Ek probeer so min as moontlik myself blootstel aan negatiewe dinge in die media en nuus veral as dit kom by kinders. Daar is vreeslik baie negatiewe dinge wat gebeur en wat ek nooit ooit sal verstaan nie, maar daar is ook baie en selfs meer goeie dinge wat gebeur wat misgekyk word deur media. Ek probeer elke dag met ‘n positiewe uitkyk my lewe vier en kan getuig dat ek baie gelukkiger is nadat ek die besluit geneem het om dit te doen. Gaan vandag en sommer elke maand en bedank jou moederfiguur vir al die hare wat sy op haar tande moes hê om jou op die regte pad te hou en steeds te koester deur al die verkeerde besluite en stoutighede wat jy al aangevang het. Tyd is kosbaar en soms hardloop dit vining uit so maak die beste van die tyd wat jy het met jou geliefdes.
Liefde, Geloof en versoeking.
1 Johannes 5:1-5 Elkeen wat glo dat Jesus die Christus is, is ‘n kind van God; en elkeen wat vir die Vader liefhet, het ook die ander lief wat kinders van die Vader is. Hieraan weet ons dat ons die kinders van God liefhet: wanneer ons God liefhet en sy gebooie onderhou. Die liefde vir God bestaan dan daarin dat ons sy gebooie gehoorsaam. Sy gebooie is ook nie moeilik om te gehoorsaam nie, want enigeen wat ‘n kind van God is, kan die sondige wêreld oorwin. En die oorwinning wat ons oor die wêreld behaal het, is deur ons geloof. Wie anders is dit wat die wêreld oorwin as hy wat glo dat Jesus die Seun van God is? Versoeking is alledaags en in menigte vorme. Versoeking van geld, aansien, beheer, oorwinning en selfs leiding is net ‘n paar. Ons almal word op een of ander manier versoek en ons kan net die versoeking weerstaan wanneer ons sterk genoeg in geloof is om te weet wat reg en verkeerd sou wees. Dr Arnold Mol skryf in sy boek: “Dink Nuut Leef Nuut” dat ‘n verkeerde gedagte nog nie sonde is nie, maar die eerste stap in ‘n reeks stappe wat uiteindelik tot dit lei. Ons val dikwels in die strik van ons eie sondige natuur veral as iemand iets aan ons gedoen het. Dit is dan maklik om daardie persoon af te kraak, sleg te maak by ander en haatdraend te raak, maar dan maak ons onsself skuldig aan skinderpraatjies en negatiwiteit wat net tot verdere onmin en ontevredenheid lei. Jesus het met die laaste maaltyd saam met sy dissiples hulle voete gewas omdat hy hulle innig liefgehad het en wou skoonwas van sonde. Hy het reeds geweet dat Judas hom sou verraai maar hom steeds liefgehad en ook sy voete gewas. Dit was so natuurlik vir Jesus om lief te hê al het hy geweet dat baie mense dit nie sal waardeer nie en hom tot dood sou veroordeel. Kan ons so liefdevol wees? Kan ons iemand steeds vergewe wat ‘n onreg aan ons gedoen het en hom of haar nie slegmaak by ander nie, maar steeds ons hand na hulle uitreik met liefde? As iemand iets aan ons doen moet ons dit nie eers uitklaar met daardie persoon nie? Hoekom is dit makliker om hulle sleg te maak? Om onsself beter te laat voel? Sodat ander mense ons jammer kan kry en ons daardeur aandag kry? En dan is die ergste van alles dat ons ook ander mense seermaak, maar wanneer iemand dieselfde of selfs minder aan ons doen wil ons die slagoffer speel. Ek dink Jesus was ‘n baie goeie voorbeeld van broederlike liefde vir mekaar, veral onvoorwaardelike liefde. Dis is reeds hoekom ons onsself moet afvra wat Jesus sou doen voor ons in die strik van selfsig, bejammering en afguns val. Dit is menslik baie moeilik en dit is iets waarmee ek self sukkel, maar dan begin ek met God praat en dan gee Hy my ‘n rustige gemoed en die vrede wat ek van Hom ontvang is onbeskryflik. In ‘n wêreld waarin daar so baie negatiwiteit en wraak is moet ons vashou aan ons geloof in God, want ons kan nie op ons eie hierdie wêreld oorwin nie. Net deur God se genade kan ons gered word.