As ons beweer dat ons nie sonde het nie, bedrieg ons onsself en is die waarheid nie in ons nie. Maar as ons ons sondes bely – Hy is getrou en regverdig, Hy vergewe ons ons sondes en reinig ons van alle ongeregtigheid. 1 Johannes 1:8-9 Wat is dit wat eerste by jou opkom as iemand jou oor Jesus se geliefkoosde dissipel, Petrus, vra? Baie mense antwoord dat hy Jesus 3 keer verraai het toe die haan kraai. Dit laat my besef dat ons dikwels negatief ingestel is en kies om die negatiewe te onthou in plaas van die positiewe. Na hierdie bevinding het ek doelbewus ‘n keuse gemaak om dinge te identifiseer wat my denke negatief beïnvloed en dit met positiewe reaksies te vul. Ons het ‘n ruk terug deur die boek “In die voetspore van Jesus” deur Piet Meiring in ons bybelstudie gegaan en ek het dadelik ‘n debat in my eie gedagtes gevoer oor die negatiewe en positiewe denke wat jou dryf om dinge te onthou. Meeste mense het gesê hulle onthou Petrus se veloëning terwyl my denke gegaan het na die feit dat hy so getrou was aan Jesus dat hy ‘n magdom mense na Jesus gelei het en dat hy as te ware die eerste kerk gebou het. Hy was so lojaal aan Jesus dat hy gevra het om onderstebo gekruising te word omdat hy nie dieselfde glorie as Jesus verdien om soos Jesus gekruisig te word nie. Die wêreld se uitkyk is negatief. Dis hoekom ons dikwels die goeie nuus iewers anders as nuuskanale moet gaan soek. Ek het doelbewus ‘n besluit gemaak om nie nuus te lees of kyk wat my in ‘n negetiewe put sal laat sink nie. Ek gaan soek liewer die goeie nuus soos ‘n menseregte organisasie wat belangrike sake maak en wen teen ‘n mislukte staat wat onregverdig optree en steel. Die Here het ons gewaarsku om nie soos die wêreld te wees nie, maar Hom te volg. Vertrou Hom en gaan te werk om die goeie te doen. Hoekom dink jy was Jesus so ontsettend lief vir Petrus? In my opinie is dit omdat Jesus geweet het daar is niemand meer lojaal as Petrus om sy koningkryk te bou nie. Jesus het Petrus se hart gesien en geweet dat hy impulsief, vining van humeur, emosioneel, avontuurlustig en lojaal was. Hy het geweet hierdie man sal veg tot die einde al sou hy een keer wankel en ontken dat hy Jesus ken. Ons weet nie hoekom Petrus vir die diensmeisie gesê het dat hy nie vir Jesus ken nie, maar toe daardie haan kraai is dit asof iets in Petrus ontplof en hy tot die besef kom dat Jesus al die tyd geweet het wat hy sou dink en doen. Dit het hom so getref dat hy in selfverwyt geval het en gehuil het. Hy kon homself eers vergewe to Jesus hom vergewe en dït was die vuur wat hom vir die res van sy lewe gelei het na die bou van Jesus se kerk. Ons almal het sonde iewers in ons verlede en iets wat jy dalk saamdra, maar jy sal nooit los en vrygemaak wees as jy dit nie na Jesus toe vat en ook jouself vergewe nie. Ons almal misluk van tyd tot tyd, maar dit beteken nie dat die Here jou minder lief het nie. Hy weet wanneer jy iets goed vir aandag en aansien doen en wanneer jy dit doen om werklik ‘n verskil in iemand anders se lewe te maak. Kies vandag om doelbewus weg te draai van die negatiewe en soek Jesus en die goeie. Kies om oplossings te sien in plaas van probleme. Die Here ken ons harte. Ken jy joune?
Jesus se heengaan is naby
Die Fariseërs het gehoor wat die mense oor Hom fluister, en hulle en die priesterhoofde het wagte gestuur om Hom gevange te neem. Jesus sê toe: “Nog net ‘n kort tydjie is Ek by julle, en dan gaan Ek terug na Hom toe wat My gestuur het. Julle sal My soek en My nie kry nie, want waar Ek dan is, kan julle nie kom nie.” Johannes 7:32-34 “My kinders, Ek is nog net ‘n klein rukkie by julle. Dan sal julle My soek, en soos Ek vir die Jode gesê het, sê Ek nou vir julle ook: Waar Ek heen gaan, kan julle nie kom nie. Ek gee julle ‘n nuwe gebod: julle moet mekaar liefhê. Soos Ek julle liefhet, moet julle mekaar liefhê. As julle mekaar liefhet, sal almal weet dat julle dissipels van My is.” Johannes 13:33-35 Jesus maak dit duidelik aan sy dissipels dat Hy net ‘n vir ‘n rukkie by hulle gaan wees voor Hy hemel toe gaan. Sy dissipels weet dus hulle het nie meer baie tyd saam met hom nie en kan dus die beste van die saak maak. Dis hartverskeurend want hulle het hom so innig lief dat hulle dit nie wil aanvaar nie. Ek leef elke dag met die wete dat dit vandag dalk iemand waarvoor ek lief is se laaste dag kan wees. Dis hartseer want die enigste sekerheid in die lewe is die dood, maar ons weet nie wanneer daardie dag aanbreek nie. So as jy lief is vir iemand hetsy familie, vriendskaplik of romanties wys dit vir daardie persoon. Ons almal wil graag weet dat ons waardeer word en dat iemand ons raaksien én ons liefhet. Ek moet bieg: voor ek besef het dat daar mense is wat my onvoorwaardelik liefhet het ek rondgedwaal en baie verkeerde besluite gemaak. Ek het liefde op verkeerde plekke gesoek en myself en mense wat werklik lief was vir my seergemaak. Die een ding wat ek vandag besef is dat Jesus die heeltyd by my was. Hy het in daardie donker verlore tyd vir my ‘n beste vriend gestuur wat my werklik bygestaan het en dit sonder dat ek dit besef het. Hy het my nooit veroordeel nie. Hy is eerlik met sy opinies en was elke dag teenwoordig. Dit het my lank gevat om te besef dat ek eintlik eers ‘n verhouding met myself en Jesus moes bou voor ek enigsins met iemand anders ‘n verhouding kan bou. Ek is nogsteeds baie bevoorreg om my ouers en baie naastes lewend te sien. Ek besef wel dat ek een of ander tyd ‘n oproep met slegte nuus sal ontvang en dit mag my moontlik breek, maar ek besef ook dat ek dankbaar moet wees dat ek nogsteeds goeie herinneringe saam met hulle kan bou. As jy vandag moet jammer sê of iemand moet laat weet dat jy vir hom of haar omgee doen dit! Tyd gaan nie vir jou en my wag nie. Die beste tyd is nou! Dank Jesus ook elke dag vir daardie mense in jou lewe wat jou innig lief het en vra Hom vir leiding wanneer jy moeilike besluite moet maak rakende mense wat jy moontlik op sy moet skuif om ‘n beter verhouding met Jesus te kweek.
Dood vir die sonde, maar lewend vir God
Wat moet ons nou hiervan sê? Moet ons aanhou sonde doen sodat die genade kan toeneem? Beslis nie. Hoe kan ons wat dood is vir die sonde, nog daarin voortlewe? Of weet julle nie dat ons almal wat in Christus Jesus gedoop is, in sy dood gedoop is nie? Deur die doop is ons immers saam met Hom in Sy dood begrawe, sodat, soos Christus deur die wonderbaarlike magsdaad van die Vader uit die dood opgewek is, ons ook so ‘n nuwe lewe kan lei. Aangesien ons met Hom een geword het in sy dood, sal ons sekerlik ook met Hom een wees in sy opstanding. Ons weet tog dat die sondige mens wat ons was, saam met Christus gekruisig is, sodat ons sondige bestaan beëindig kon word. Ons is dus nie langer slawe van die sonde nie. Iemand wat gesterf het, is immers vry van die mag van die sonde. Ons het saam met Christus gesterwe; daarom glo ons dat ons ook saam met Hom sal lewe. Ons weet dat Christus wat uit die dood opgewek is, nie weer kan sterwe nie; die dood het nie meer mag oor Hom nie. Hy het gesterwe en is eens en vir altyd vir die sonde dood. Nou lewe Hy, en Hy lewe vir God. Julle moet dus altyd onthou dat ook julle vir die sonde dood is, maar vir God lewe, omdat julle een is met Christus Jesus. Moet dan nie toelaat dat die sonde nog langer oor julle heerskappy voer en julle die begeertes van julle sterflike aardse bestaan laat gehoorsaam nie. Julle moet geen deel van julle liggame in diens van die sonde stel as ‘n werktuig om goddeloosheid te bedrywe nie. Nee, stel julle in diens van God as mense wat dood was maar weer lewend gemaak is, en stel elke deel van julle liggame in diens van God as werktuig om te doen wat God wil. Die sonde moet nie meer baas wees oor julle nie, want julle staan nie onder die wet van Moses nie, maar onder die genade. Romeine 6:1-14 Voel jy ook gereeld skuldig dat jy sondige neigings het? Dankie tog Jesus is ons enigste Verlosser en nie meer ‘n boek met wette wat gehoorsaam moet word om hemel toe te gaan nie! Ek raak soms negatief en dink “wat sal die mense wat my 15 jaar terug geken het nou van my dink?” Ek meen ek verklaar nou dat ek Jesus se volgeling is en is nie skaam of bang om dit nou op die mou te dra nie, maar so 15 jaar terug se gedrag het ‘n heel ander prentjie geskep. Glad nie ‘n rolmodel nie! Ek sou liewer mense in die afgrond in help as hul net na my leefstyl sou kyk. Dis wat die duiwel kom doen: hy kom om jou leuens te vertel; om jou sleg te laat voel en te herinner aan die letsels wat jy oorhou van daardie verlore dae. Gelukkig kon ek my pad terug vind na God en tot die besef kom dat Hy my onvoorwaardelik lief het. Hy kom en gooi my “ou koeie” in die sloot en herinner my dat dit daar gevrot het en deur die kraaie en hyenas opgevreet is! “N Dief kom net steel en slag en uitroei; Ek het gekom sodat hulle die lewe kan hê, en dit in oorvloed.” – Joh. 10:10 Ek kyk onlangs ‘n preek van Andries Vermeulen – Onthou die Eend – waar hy vertel van die seun wat die kosbare eend met sy kettie doodskiet. Sy sussie en ouma sien die daad. Die sussie kom en herinner hom aan sy “sonde” en boelie hom daardeur om haar take te verrig. Die ouma bly stil en wag geduldig totdat die seun uiteindelik genoeg gehad het en sy “sonde” aan haar verklaar. Haar reaksie was dat sy verbaas was dat hy so lank toegelaat het dat sy sussie hom boelie. Andries verduidelik verder as iemand vir jou kom sê: “onthou die eend” moet jy onthou dat die Here sê: dit is afgehandel! Ons moet dalk fokus op die hier en nou en die pad wat ons vorentoe kies. Gooi die onnodige bagasie wat jy moontlik nog ronddra weg en kyk op. Jesus is ons enigste Herder wat genadiglik ons sonde op Hom geneem het. Leef vir Hom en weet dat jy verlos is van dit wat jou terughou om die beste weergawe van jouself te wees!