15“Maar julle,” het Hy gevra, “wie, sê julle, is Ek?” 16Simon Petrus het geantwoord: “U is die Christus, die Seun van die lewende God.” 17“Gelukkig is jy, Simon Barjona,” het Jesus vir hom gesê, “want dit is nie ‘n mens wat dit aan jou geopenbaar het nie, maar my Vader wat in die hemel is. 18En Ek sê vir jou: Jy is Petrus, en op hierdie rots sal Ek my kerk bou, en die magte van die doderyk sal dit nie oorweldig nie. 19Ek sal aan jou die sleutels van die koninkryk van die hemel gee, en wat jy op die aarde toesluit, sal in die hemel toegesluit bly; en wat jy op die aarde oopsluit, sal in die hemel oopgesluit bly.” Dit is vir my opvallend dat die dinge wat ons op aarde doen so groot invloed het op die hemelse. Ons besef nie aldag hoe gelukkig ons is dat Jesus vir ons sondes kom sterf het nie. Dit voel soms nogsteeds onwerklik. Ons moet daarna streef om Sy wil uit te leef deur te let op wanneer ons sonde doen en dit dadelik te bely en goedhartig op te tree aan ons naaste. Niemand was nog ooit perfek nie en ek is beslis ook nie. Jesus het geweet Petrus sou sy Naam uitbasuin en alle mense van Hom vertel en dit nog voordat Petrus die haan hoor kraai het. Wanneer jy na die waarheid soek en ‘n pad stap met die Here beteken dit nie dat die pad net perfek en mooi gaan wees nie. Mens word getoets en uitgeput. Daar kom mense oor die pad wat vreeslik lelik kan wees, maar deur dit als moet ons fokus op die eindstreep wees: God, Jesus, Hemel. Die res en die wereld sal vergaan, maar die Here wat alles gemaak het gaan bly staan. Fokus dus op die goeie en hou aan met die pad saam God.
God se wil
5“Verder, as julle bid, moet julle nie soos die skynheiliges wees nie. Hulle hou daarvan om in die sinagoges en op die straathoeke te staan en bid sodat die mense hulle kan sien. Dit verseker Ek julle: Hulle het hulle beloning klaar weg. 6Nee, as jy bid, gaan na jou kamer toe, maak die deur toe en bid tot jou Vader wat jy nie kan sien nie. Jou Vader wat sien wat verborge is, sal jou beloon. 7“Wanneer julle bid, moet julle nie soos die heidene ‘n stortvloed van woorde gebruik nie. Hulle verbeel hulle hulle gebede sal verhoor word omdat hulle baie woorde gebruik. 8Moet dan nie soos hulle maak nie, want julle Vader weet wat julle nodig het, nog voordat julle dit van Hom vra. 9“So moet julle bid: “Ons Vader wat in die hemel is, laat u Naam geheilig word; 10laat u koninkryk kom; laat u wil ook op die aarde geskied, net soos in die hemel. 11Gee ons vandag ons daaglikse brood; 12en vergeef ons ons oortredings soos ons ook dié vergewe wat teen ons oortree; 13en laat ons nie in versoeking kom nie maar verlos ons van die Bose. 14“As julle ander mense hulle oortredings vergewe, sal julle hemelse Vader julle ook vergewe. 15Maar as julle ander mense nie vergewe nie, sal julle Vader julle ook nie julle oortredings vergewe nie.” Matteus 6:5-15 Daar is al soveel keer gevra: “wat is God se wil vir my lewe?” Hoe meer ek lees hoe meer besef ek die antwoord is eintlik heel eenvoudig: om Hom te dien met hart en siel en verstand en sy Naam uit te leef sodat ander Hom kan leer ken! Ek kom tot die besef dat dit nie oor my alleen gaan nie, maar oor die mensdom as ‘n geheel. God het van die begin af gevra dat ons Hom loof en gehoorsaam. Daar waar jy is kan jy ‘n finominale verskil in iemand se lewe maak om net te luister na daardie persoon en hom te help om die Here beter te leer ken of selfs daardie persoon te leer hoe om vir hom of haarself kos te kan maak. Ons neem baie dinge as vanselfsprekend aan en besef nie altyd dat mense ‘n behoefte het aan geselskap of hulleself te probeer verbeter deur meer te leer hoe om eenvoudige dinge te doen nie. Ons neem aan dat hulle weet hoe om kos te maak of ‘n soom in te sit of om ‘n CV op te stel, maar het ons die tyd geneem om uit te vind of hulle al gewys is hoe om dit te doen? Wanneer ons dan iets vir ander doen, moet ons dit nie doen vir aansien nie, maar uit opregte waardering vir die feit dat God ons vrygekoop het in hierdie sondige aardbol. Hy verwag van ons om steeds Sy naam uit te leef en ons doen dit deur dade van liefde vir ander. Ons harte moet opreg wees wanneer ons iets vir iemand anders doen anders kan jy dit netsowel los. God kyk na jou hart wanneer jy iets doen. Gaan gee iemand wat jy nie so goed ken nie of selfs ‘n vreemdeling ‘n drukkie vandag. Daardie persoon het dit dalk broodnodig.
Moenie die genade van God verwerp nie
“Beywer julle vir vrede met alle mense asook vir ‘n heilige lewe, waarsonder niemand die Here sal sien nie. Sorg dat niemand van die genade van God afvallig word nie. Sorg dat daar nie verbittering soos ‘n wortel uitspruit, moeilikheid veroorsaak en baie besmet nie. Sorge ook dat niemand sedeloos en goddeloos lewe nie, soos Esau wat vir een maaltyd sy eersgeboortereg verkoop het nie.” Hebreërs 12:14 Hoe maklik is dit nie om ‘n wrok teen iemand te hou wat van jou skinder of seermaak of misbruik of kul of of of…? Dit neem die vrede uit jou hart uit en jy sit soms en wonder waar hierdie ontevredenheid vandaan kom. Jesus kom leer ons dat ons genadig moet wees met ander mense. Ek weet dit is verskriklik moeilik veral as daardie persoon jou baie seergemaak het. Jesus bid in Lukas 23:34: “Vader vergewe hulle, want hulle besef nie wat hulle doen nie” en dit terwyl Hy op die kruis hang nadat die mense Hom veroordeel het en dit nadat die keiser gesê het dat Hy onskuldig is, maar die mense het hulle eie opinie gemaak en het hom skuldig verklaar om gekruisig te word. Dit moes baie seer gemaak het en tog verstaan Jesus hoe die mens se hart en brein werk. Hy vra dus vir vergifnis omdat ons nie altyd bewus is van ons denke se gevolge nie. Ons moet ons hart en denke bewaar teen aanslagte van die duiwel. Daardie simpel duiwel is die baas van leuens vertel. As jy in jou binneste voel dat jy nou gaan skinder, STOP! Vra jouself af hoe jy sou voel as dit jy was wat van geskinder sou word. Jy weet jy doen iets verkeerd as jy nie dit openlik kan sê of doen nie. Laat dit vir jou die basis vorm om te besluit wat reg of verkeerd is en jou denke aan te pas om die regte ding te doen soos Jesus ons kom leer het. Ons moet ook introspeksie doen om vas te stel waar ons ook al iemand te na gekom het. Wanneer jy besef dat jy net so skuldig is aan dinge wat ander aan jou doen besef jy hoe jy dit kan verhoed en makliker jy kan vergewe veral omdat God jou dadelik vergewe en daarvan vergeet wanneer jy dit by Hom gaan bely.